Një tjetër medalje ari i ka ardhur Shqipërisë, këtë herë si vendi më i korruptuar në Ballkanin Perëndimor.
Koalicioni SELDI, i cili vëzhgon korrupsionin dhe qeverisjen në Europën Juglindore vlerëson se Shqipëria mban vendin e parë në rajon për normat më të larta të rryshfetit (40 për qind), duke lënë pas Serbinë, Maqedoninë e Veriut, Bosnjen, Malin e Zi dhe Kosovën.
Në Shqipëri, po sipas raportit, janë presionet më të mëdha të zyrtarëve ndaj qytetarit për të dhënë ryshfet, teksa 80 % e shqiptarëve e pranojnë se janë të ekspozuar përballë korrupsionit.
Një tjetër pikë e studimit vlerëson se politikat antikorrupsion në Shqipëri dhe rajon nuk priren të prodhojnë një efekt të qëndrueshëm, ndërsa institucionet publike dhe partitë politike po bashkohen me rrjetet e kapjes së shtetit që rrëmbejnë vendimmarrjen e qeverisë.
Qëndresa Qytetare vlerëson se korrupsioni është kthyer në një gangrenë që përveçse mban larg integrimin, kalb themelet e shtetit, duke nxitur mjerim, shkatërrim dhe eksod.
Qëndresa Qytetare nxit qytetarët në mbarë vendin të denoncojnë aktet korruptive pranë instancave ligjzbatuese pasi heshtja është bekim i korrupsionit, fenomen me pasoja afatgjata e në shumë raste të parikuperueshme.
