Paga minimale më ulët në Evropë, qeveria të mos e amnistojë korrupsionin dhe informalitetin!

 EUROSTAT vlerëson se edhe pas rritjeve të vazhdueshme, paga minimale në Shqipëri vijon të mbetet ndër më të ulëtat në Evropë në vlerë nominale.Pavarësisht kësaj çmimet e shportës në Shqipëri taksohen më shtrenjtë se kudo në Evropë dhe nën këtë varfëri, qiellgërvishtësit vijojnë të ngrihen pasi në themele dhe kolona është e dukshme se kanë para që vijnë nga korrupsioni dhe narkotrafiku. Vetë Banka e Shqipërisë në një studim të kryer nga departamenti i kërkimeve mbi brishtësinë financiare të familjeve, duke u bazuar në aftësinë e tyre për të përballuar një shpenzim të papritur, doli në përfundimin se 60% e familjeve nuk kanë likuiditete për ‘surpriza’ të paplanifikuara financiare, këtu kemi parasysh shpenzime spitalore, apo probleme të tjera që mund të përballen familjet shqiptare.Qëndresa Qytetare vlerëson se pagat e ulëta janë në themel të eksodit masiv të shqiptarëve dekadën e fundit.Qëndresa Qytetare i kërkon instancave shtetërore t’i shpallin luftë të pa kompromis informalitetit dhe korrupsionit, pasi janë e vetmja formë për të kuruar plagën e eksodit të krahut të punës.