👉 QQ: 6 universitete shpenzuan 1.7 milion euro për sigurinë e godinave dhe 650 000 euro për orendi zyre.
👉 QQ: Mirëmbajtja e çatisë së Rektoratit të UT 111 000 euro
👉 QQ: Covid 19 ndaloi mësimin fizik por jo ndërtimet në universitete. 6 milion euro rikosntruksion dhe mirëmbajtje.
👉 QQ: Kërkimi shkencor për të tretin vit radhazi mbetet në vlerën 0.1% (38 000 euro) e shpenzimeve totale të 6 universiteteve (32 milion euro)
Qëndresa Qytetare publikoi sot raportin e monitorimit financiar të 6 universiteteve publike me fokus shpenzimet nga tarifat e studenteve për një vit akademik të plotë (1 shtator 2019 – 30 Gusht 2020). Ky monitorim u kombinuar dhe me sondazhin me 400 studente të cilët u pyetën mbi nivelin dhe koston e shërbimeve që marrin në universitete e tyre.
Pavarësisht gjendjes së shkaktuar nga tërmteti dhe pandemia, gjatë vitit akademik 2019 – 2020 zyrtarët e Universitetit të Tiranës janë shpërblyer me rreth 1.7 milion euro honorare, ndërsa ata të UPT kanë shpenzuar 106 000 euro për dieta dhe udhëtime. Gjithashtu Universiteti i Tiranës ka shpenzuar 413 Mije Euro për moblije dhe orendi zyre, por 0 lek për zërin e studimeve dhe kërkimit shkencor. Ndërkohë 95% e studentëve shprehen se printojnë në kancelaritë pranë unviersitetit me paratë e tyre, ndërsa për digjitalizimin e shërbimeve administrative ndaj studentëve dhe ribursimin e paketave të internetit nuk ka pasur asnjë investim.
6 universitetet e marra në monitorim kanë shpenzuar në total rreth 80 000 euro për zërin “Telefon dhe Internet”, ndërkohë që 59% e studentëve të pyetur shprehen se nuk kanë akses në internet në hapësirat e universitetit të tyre.
Universiteti i Tiranës ka shpenzimet më të larta për rikonstruksion dhe mirëmbajtje ndërtesash me vlerën prej rreth 3.7 milion eurosh, ku vetëm mirëmbajtja e çatisë së Rektoratit të UT-së, ka kushtuar 111 000 euro
Pavarësisht se 6 universitetet kanë shpenzuar 850 000 euro për mirëmbajtje rrjetesh dhe pajisje informatike, vetëm 6% e studentëve deklarojnë se i përdorin shpesh pajisjet informatike të universitetit. 60% e tyre nuk i kanë përdorur asnjëherë dhe 34% e studentëve shprehen se i kanë përdorur vetëm disa herë këto pajisje. Universiteti i Tiranës ka shpenzuar 530 000 euro për sigurinë e godinave në një vit akademik, ndjekur nga Universiteti i Elbasanit me 400 000 euro dhe Universiteti Politeknik i Tiranës me 300 000 euro pagesa për sigurinë me roje të godinave universitare.
